‘नेपालमा जुलाईदेखि अन्तर्राष्ट्रिय हवाई उडान नियमित हुँदै, चाटर्ड उडानलाई पनि अनुमति’

प्रकाशित मिति : १६ असार २०७८, बुधबार

काठमाडौं । नेपालले सिमित संख्यामा नियमित अन्तर्राष्ट्रिय उडानका लागि अनुमति दिने निणर्य गरेको छ ।
कोरोनाभाइरसको महामारीका कारण नेपालमा अन्तर्राष्ट्रिय हवाई उडानहरूमा अझै केही समय असहजता भने देखा परिरहन सक्ने सम्बद्ध अधिकारीहरूले बताएका छन् ।
मन्त्रिपरिषद्को निणर्यपछि सरकारले अघिल्लो साताबाट सीमित संख्यामा अन्तर्राष्ट्रिय उडानहरूको निम्ति अनुमति प्रदान गरेको थियो ।
तर हाल पनि सीमित नियमित र चार्टर्ड उडान दुवैले अनुमति पाएको भन्दै नागरिक उड्डयन मन्त्रालयका अधिकारीहरूले आगामी जुलाई १ बाट नियमित उडानहरूलाई बढी प्राथमिकतामा राखिने बताएका छन् ।
तर नेपालमा कोरोना भाइरसको डेल्टा प्लस भेरिअन्ट देखा परेको भन्दै टर्कीले नेपालसहित सातवटा देशबाट अर्को सूचना नभएसम्मका लागि त्यहाँका हवाई यात्रीलाई आफ्नो देशमा प्रवेश नदिने जनाएको छ ।