‘विश्व प्रसिद्ध मोनालिसा चित्रकलाको प्रतिकृति करोडौँ रुपैयाँमा लिलाम’
![](https://www.mediaclubnepal.com/wp-content/uploads/2021/06/Mona-Lisha-Cover-Foto-768x431.png)
लिओनार्दो दा भिन्चीले बनाएको प्रख्यात चित्रकला मोनालिसाको एउटा प्रतिकृति प्यारिसमा विक्री हुन लागेको छ । रेमन्ड हेकिङले मोनालिसाको प्रतिकृति सन् १९५० को दशकमा एक कलाविक्रेतासँग किनेका थिए ।
उक्त कलाकृतिले तीन लाख पाउन्डसम्म अर्थात् झन्डै ४.९ करोड नेपाली रुपैयाँ मूल्य पाउने अपेक्षा गरिएको छ ।
उक्त कृति दा भिन्चीका एक अनुयायीले अठारौँ शताब्दीको सुरुतिर बनाएको विश्वास गरिन्छ । पछि रेमन्ड हेकिङ नामक व्यक्तिको स्वामित्वमा पुगेकाले हिजोआज त्यो कृतिलाई “मोनालिसा हेकिङ” भनेर चिनिन्छ ।
हेकिङको मृत्यु सन् १९७७ मा भयो। उनले अहिले लूभ्र सङ्ग्रहालयमा भएको मोनालिसाको चित्र वास्तविक नभएको आशङ्का व्यक्त गरेका थिए ।
त्यति मात्र हैन उनले सङ्ग्रहालयलाई त्यहाँ भएको चित्रकला वास्तविक मोनालिसा भएको प्रमाणित गर्न चुनौती दिएका थिए । यो प्रतिकृति प्यारिसस्थित क्रिस्टीज् लिलामघरमा विक्री हुनेछ ।
क्यान्भासमा बनाइएको उक्त कला हेकिङले नीसस्थित एक कलाविक्रेतासँग सन् १९५० को दशकमा किनेका थिए ।
“यो कृति अनि यसको इतिहासले मोनालिसा र लिओनार्दो दा भिन्चीको गौरवप्रतिको रुचि देखाउँछन्,” क्रिस्टीज्ले एउटा विज्ञप्तिमा भनेको छ।
![](https://www.mediaclubnepal.com/wp-content/uploads/2021/06/MonaLisha-Foto-768x432.jpg)
ओल्ड मास्टर पेन्टिङ्सका अन्तर्राष्ट्रिय निर्देशक प्येअर एट्येनलाई उद्धृत गर्दै क्रिस्टीज्ले भनेको छः मोनालिसा हेकिङ “एक कलानुरागी व्यक्तिको सपना हो। त्यो ती व्यक्तिको आदर्श हो ।”
“कला इतिहासकार र विश्वभरिको सञ्चारमाध्यममा रेमन्ड हेकिङ त्यसको (मोनालिसा हेकिङको) निष्ठावान् रक्षक थिए ।”
मोनालिसालाई संसारकै सर्वाधिक प्रसिद्ध चित्रकला मानिन्छ ।
पुनर्जागरण कालका इटलीका कलाकार लिओनार्दो दा भिन्चीलाई अहिलेसम्मकै एक महान् चित्रकार मानिन्छ । उनले उक्त कृति सत्रौँ शताब्दीमा बनाएका थिए ।
सन् १९११ मा मोनालिसा लूभ्र सङ्ग्रहालयबाट चोरी हुँदा संसारभरि ठूलो हल्लाखल्ला मच्चियो । सङ्ग्रहालयका एक कर्मचारी उक्त कला चोर्न रातभरि दराजभित्र लुकेका थिए ।
तर सन् १९१३ मा उनले पुरानो सामान सङ्कलन गर्ने एक व्यापारीलाई बेच्न खोज्दा मोनालिसा फेला पर्यो । दुई वर्षअघि “अर्लिअर मोनालिसा” नामक एउटा चित्रकलाको स्वामित्वबारे ठूलो विवाद भयो ।
उक्त कृति सन् १९६० को दशकमा लन्डनस्थित एउटा घरमा अगेनोमाथि भेटिएको थियो ।
(एजेन्सी)