राप्रपाको अध्यक्षमा राजेन्द्र लिङ्देन विजयी, ‘कमल थापा भन्छन् : दरबारको कारण हारे’

प्रकाशित मिति : १९ मंसिर २०७८, आइतबार

काठमाडौं । राष्ट्रिय प्रजातन्त्र पार्टीको अध्यक्ष पदमा राजेन्द्र लिङ्देन विजयी भएका छन् ।
राप्रपाको महाधिवेशनमा निर्वाचन प्रमुख हरिबहादुर बस्नेतले बताए अनुसार लिङ्देनले २०० मतले आफ्ना प्रतिस्पर्धी तथा लामो समय अध्यक्ष रहँदै आएका कमल थापालाई पराजित गरेका हुन् ।
गत बुधवारदेखि काठमाण्डूमा शुरू भएको महाधिवेशनमा नेतृत्वका लागि भएको मतदानको परिणाम आज प्राप्त भएको हो ।
पार्टी प्रवक्ता मोहनबहादुर श्रेष्ठले जनाए अनुसार लिङ्देनले १,८१७ मत प्राप्त गरेका छन् भने थापाले १,६१७ मत प्राप्त गरेका छन् । कुल मतदाता करिब ३८ सय रहेका थिए । त्यसमध्ये ४३१ मत बदर भएको बताइएको छ ।
कमल थापाले सामाजिक सञ्जाल मार्फत आफ्नो हार स्वीकार गरेका छन् । थापाले ट्वीट गर्दै दरबारले खेलेका कारण आफूले हारेको बताएका छन् ।