श्री मनकामना साकोसद्वारा विद्यार्थीलाई शैक्षिक सामाग्री वितरण

प्रकाशित मिति : १२ बैशाख २०८१, बुधबार

काभ्रे । काभ्रेपलाञ्चोक जिल्लाको बनेपामा मुख्य कार्यालय रही विभिन्न जिल्लाबाट सेवा प्रदान गरिरहेको श्री मनकामना बचत तथा ऋण सहकारी संस्थाले शैक्षिक सामाग्री वितरण गरेको छ । संस्थाले विद्यालय शैक्षिक कार्यक्रम २०८१ अन्र्तगत बनेपा नगरपालिका वडा नं २ घिमिरेगाउँमा रहेको श्री श्वेत बराह माध्यमिक विद्यालयमा अध्ययनरत विद्यार्थीहरुलाई शैक्षिक सामाग्री वितरण गरेको हो ।

विद्यार्थीहरुमा शिक्षाप्रतिकोे रुचि र क्षमता अभिवृद्धि गर्ने उद्देश्यले शैक्षिक सामग्री वितरण गर्दै विद्यालय शिक्षा कार्यक्रम सम्पन्न गरेको संस्थाले जनाएको छ । कार्यक्रममा संस्थाका प्रमुख कार्यकारी अधिकृत राजकुमार दाहालले विद्यार्थी र अभिभावकहरूलाई मनकामना सहकारी संस्थाका बारे जानकारी दिएका थिए । कार्यक्रममा संस्थाका अध्यक्ष बालकृष्ण दाहालको समेत उपस्थिति रहेको थियो । संस्थाले समुदाय र सदस्य केन्द्रीत भएर आफ्नो गतिविधिहरु गर्दै आएको छ ।