सिएमसी काभ्रेको आयोजनामा ‘सहकारीमा सुरक्षा संयन्त्र’ विषयक अन्तरक्रिया कार्यक्रम सम्पन्न
काभ्रे । कोअपरेटिभ मेनेजर्स क्लब, काभ्रेको आयोजना र अल्ट्रानेट कम्युनिकेशनको प्राविधिक सहयोगमा जिल्ला सहकारी संघ लि. काभ्रेको सभा हलमा ‘सहकारीमा सुरक्षा संयन्त्र’ विषयक अन्तरक्रिया कार्यक्रम सम्पन्न भएको छ ।
क्लबका अध्यक्ष मदन बस्नेतको सभापतित्वमा संचालित कार्यक्रममा जिल्ला सहकारी संघ लि काभ्रेका अध्यक्ष दिलिप शर्मा प्रमुख अतिथिको रुपमा रहनुभएको थियो । काभ्रे जिल्लामा संचालनमा रहेका विभिन्न सहकारी संस्थाहरुबाट ४० जनाको सहभागिता रहेको कार्यक्रमलाई हिकभिजन नेपालका तर्फबाट सुप्रिम कोईराला र रुपेश बस्नेतले सहजीकरण गर्नु भएको थियो । दिनानुदिन सहकारी संस्थाहरुमा चोरी डकैती बढ्दै गएको र सुरक्षा चुनौती थपिदै गएको सन्दर्भमा संस्थाहरुलाई सुरक्षित बनाउनको लागि पहलकदमी स्वरुप कार्यक्रम आयोजना गरिएको अध्यक्ष बस्नेतले बताउनुभयो । क्लबका सचिव ठाकुरनाथ अधिकारीले संचालन गर्नुभएको कार्यक्रममा सहभागीहरुलाई क्लबका उपाध्यक्ष गोपाल दाहालले स्वागत गर्नुभएको थियो ।
