आभाष साकोसको आयोजनामा निःशुल्क स्वास्थ्य शिविर
काभ्रे । काभ्रेको बनेपामा केन्द्रीय कार्यालय रहेको आभाष बचत तथा ऋण सहकारी संस्था लिमिटेडले विश्व क्यान्सर दिवसका अवसरमा निःशुल्क स्वास्थ्य शिविरको आयोजना गरेको छ ।
आभास साकोसले नेपाल अर्बुद रोग निवारण संस्था काभ्रेसँगको सहकार्यमा आइतबार बनेपा–५ स्थित घोकेचौरमा पाठेघरको मुखको क्यान्सर सम्बन्धी स्वास्थ्य शिविर आयोजना गरेको हो ।
नेपाल अष्ट्रेलियन सर्भाइकल क्यान्सर फाउण्डेशनले प्राविधिक सहयोगमा आयोजना गरिएको शिविरमा ४० जनाले स्वास्थ्य परिक्षण गराएका थिए ।
शिविरमा १७ जनालाई क्यान्सर सम्बन्धी इन्फेक्सनको औषधी प्रदान गरिएको थियो भने २ जना क्यान्सर पीडितको उपचार गरिएको आभाष साकोसका प्रमुख प्रबन्धक सुवास वैद्यले जानकारी दिनुभयो । उनका अनुसार शिविरमा आङ खसेकी एक महिलाको उपचार गरिएको थियो ।
