‘बालबालिका तस्करी १५ वर्षमा तीन गुणा वृद्धि’

प्रकाशित मिति : २० माघ २०७७, मंगलबार

काठमाडौं । विगत १५ वर्षयता बालबालिका तस्करी गर्ने क्रम तीन गुनाले बढेको संयुक्त राष्ट्र सङ्घले बताएको छ ।
लागु औषध तथा अपराधसम्बन्धी राष्ट्रसङ्घीय कार्यालयको एउटा अध्ययन प्रतिवेदन अनुसार सन् २०१८ मा १४८ वटा देशमा बालबालिकाको अवैध ओसार पसारका करिब ५० हजार घटना भएको तथ्याङ्क छ ।
वास्तविक संख्या अझ बढी हुनसक्ने प्रतिवेदनमा उल्लेख छ ।
बालिकाहरूलाई मुख्यतः यौन शोषणका लागि र बालकहरूलाई बलपूर्वक श्रम गराउनका लागि तस्करी गर्ने गरिएको राष्ट्रसङ्घले जनाएको छ ।
कोरोनाभाइरस महामारीका कारण लाखौँ मानिस काम विहीन बन्न पुगेकाले र बालबालिकाहरू विद्यालय जान नपाइरहेकाले अवस्था झन खराब हुनसक्ने प्रतिवेदनले औँल्याएको छ ।