१८ असार २०७६, बुधबार ०५:३७

माक्स बिना हिँड्नै मुस्किल, तर, प्रधानमन्त्री यथार्थभन्दा बाहिर गएर किन बोल्दैछन् ?


प्रधानमन्त्री केपी शर्मा ओलीले पछिल्लो समयमा दिएका केही अभिव्यक्तिको सर्वसाधारणले चर्को आलोचना गर्दै आएका छन्।

उनले अपत्यारिला अभिव्यक्ति दिएकै कारण आलोचना भएको हो। गत शनिबार मदन भण्डारीको ६८औं जन्मजयन्तीका अवसरमा आयोजित कार्यक्रमलाई सम्बोधन गर्दै ओलीले भनेका थिए, ‘मैले प्रधानमन्त्री हुँदाका बेला भनेको थिएँ– अब काठमाडौंमा नाक समाएर हिँड्नुपर्दैन। माक्स लगाएर हिँड्नुपर्दैन। म प्रधानमन्त्री हुँदा आधा जनसंख्या माक्स लगाएर हिँड्थे। अहिले सडकमा मास्क लगाएर कोही पनि हिँड्दैनन्।’

प्रधानमन्त्रीले यस्तो भनेपछि कार्यक्रममा उपस्थित धेरैले तालीसमेत बजाए। प्रधानमन्त्रीको भाषण पत्याउने हो भने उपत्यका धुवाँ र धुलोमुक्त भएकाले सडकमा माक्स लगाएर हिँड्नपर्ने अवस्था छैन्। तर, यथार्थ भने ठीक उल्टो छ। प्रधानमन्त्रीले हावादारी कुरा बोलेको भन्दै सामाजिक सञ्जालमार्फत चर्को आलोचना भएको छ।

सडकमा हिँड्नेले पनि प्रधानमन्त्रीले यथार्थभन्दा बाहिर गएर बोलेको भन्दै आलोचना गरेका छन्। जोरपाटी, बौद्ध, चाबहिल, रत्नपार्क, कोटेश्वर, चक्रपथ, थानकोटलगायत सडकमा हिँड्दा वायु र धुलो–धुवाँजन्य प्रदूषणबाट बच्न माक्स लगाएर हिँड्नपर्छ।

प्रधानमन्त्रीले वास्तविकताभन्दा टाढा गएर भाषण गरेको भन्दै सर्वसाधारण एकै स्वरमा भन्छन, ‘माक्सबिना त सडकमा हिँड्नै सकिँदैन।’ यो खबर आजको नागरिक दैनिकमा श्याम राईले लेखेका छन्।

माक्स लगाएर बौद्धस्थित सडकमा हिँडिरहेका कपनका गोपाल तामाङले अचाक्ली धुवाँ–धुलोका कारण जनस्वास्थ्यमा असर परेको बताए। उनले धुलो–धुवाँबाट हल्का बच्न माक्स लगाएर हिँड्नुबाहेक विकल्प नभएको बताए।

उनले भने, ‘बौद्ध–जोरपाटी सडकमा धुलोले मान्छे देखिँदैन। माक्सबिना घरबाहिर निस्कनै सकिँदैन। धुलोबाट बच्न दैनिक माक्स लगाउँछु। माक्सबिना हिँड्न त सडक धुवाँ–धुलोमुक्त हुनुपर्छ नि।’

धेरै चहलपहल हुने सुन्धारामा मास्क लगाएर हिँडिरहेका चाबहिलका भुवन दाहालले उपत्यकामा धुवाँ र धुलोका कारण माक्स र चश्माबिनाको यात्रा कल्पना पनि गर्न नसकिने बताए।

उनले प्रधानमन्त्री ओलीको अभिव्यक्तिप्रति असन्तुष्टि जनाए। ‘प्रधानमन्त्रीले अहिले सडकमा सर्वसाधारण माक्सबिना हिड्छन् भन्नुभएको छ। उहाँको यो भनाइ लज्जास्पद छ,’ बाटोमा माक्स लगाएर हिँडिरहेका अन्य मानिसलाई देखाउँदै उनले भने, ‘सडममा हेर्नुस्, कहाँ माक्सबिना सर्वसाधारण हिँडेका छन्। सबैले माक्स लगाएका छन्।’

उनका अनुसार बौद्ध–जोरपाटी सडकमा धुलोले गर्दा दिनमै अन्धकारमा हिँडेजस्तो हुन्छ। बिग्रेको सडक अहिलेसम्म पिच हुन सकेको छैन। धुलोबाट बच्न सर्वसाधारण माक्स लगाउन बाध्य छन्।

माक्स लगाइरहेको अवस्थामा चाबहिल चोकमा भेटिएका कपनकै सुगम भुजेलले सडकको धुलोले स्वास्थ्यमा असर पु¥याउने भएकाले बच्न माक्स लगाएर हिँड्ने गरेको बताए।

‘धुवाँ–धुलोले फोक्सोमा असर गर्छ। स्वास्प्रश्वासमा समस्या आउँछ,’ उनले भने, ‘रोगबाट बच्न माक्स लगाउँछु। सडकमा हिँड्ने सबैले नाक–मुख छेक्न माक्स लगाएको देख्छु। माक्स नलगाईकन हिँड्न त सहर स्वाच्छ र हरियाली हुनुप¥यो नि। प्रधानमन्त्री यथार्थभन्दा बाहिर गएर बोल्नुभयो।’

उपत्यकामा माक्सबिना हिँड्न सरकारले सबै सडक पिच गर्नुपर्ने, सडकमा जम्मा हुने धुलो दैनिक तह लगाउनुपर्ने र धुवाँ फाल्ने थोत्रा गाडी चल्न रोक लगाउनुपर्ने उनले बताए। उपत्यकामा जताततै धुलो र धुवाँ छ। ‘प्रधानमन्त्रीले गलत कुरा गर्न सुहाउँदैन,’ उनले भने ।

प्रतिक्रिया दिनुहोस
हाम्रो बारेमा
सूचना विभाग दर्ता नं. : 14020-75/76
प्रेस काउन्सिल नेपाल दर्ता नं. : 805-075/076
अध्यक्ष : श्यामकृष्ण लम्साल (एस.के. लम्साल)
सम्पादक : सरोज सत्याल
कार्यकारी सम्पादक : दिपक तिमल्सिना
             
सम्पर्क
ठेगाना : बनेपा, काभ्रे
सम्पर्क कार्यालय : काठमाडौं म.न.पा.–३५, सुविधानगर, काठमाडौं
सम्पर्क नम्बर : ९८४१९७३१२०, ९८५११४२७६६
इमेल ठेगाना : [email protected]
सामाजिक संजालमा हामि